من زمان

غايبة عن مدونتي من زمان

بس كل ما أنشغل عنها حاجة تفكرني أني لازم أرجع عليها بسرعة وأدون من تاني

آسفة جدا لكل حد اتاخرت اني أنشر تعليقه

أو أرد على رسالته وأسف أكتر لمهند

لأني طولت عليه قوي
وهنا هارد على مهند
رغم اني ماكنتش عاوزة أبداً أرد ع المدونة بس يعني نظراً لانه طرح سؤال طرحه علي ناس كتير
ركز معايا يا مهند لأنه
يهمني جدا إني أوضح وجهة نظري ليك وأطلب منك أنك تقف في زاويتي دقايق وتطل منها ع الموضوع
بدايةً يا كريم لو إن المسلمين ردوا على واحد بيشتم بشتيمة ماحدش يقدر يتهمهم بشيء لانهم بساطة بيردوا مش بادئين بالشتيمة
ثانيا تخيل يا مهند انك في مجتمع علماني المسلمين فيه اقلية
هل يبقى من حق المجتمع أنه يسجن واحد مسلم عبر عن رأيه اللي هو بالضرورة مخالف ليهم في السجن؟
ثالثاً
تعرف إيه هي الخلفيات اللي خلت كريم يكتب اللي كتبه ولا قريت كلام كريم واللي بيهاجموه وخلاص؟
تعرف أنه كتب ده بعد أحداث الاسكندرية وكان غاضب جدا من سلوكيات المسلمين وقتها واللي هي فعلا كانت مقرفة جدا وينبغي علينا أننا نغضب منها أكتر من كريم لو فعلاً احنا بنحب دينا وغيورين عليه
تعرف يعني إيه طفل اخته تتحجب وهي طفلة وأهلها يطلعوها من المدرسة بحجة التدين ؟
ما تطالبش طفل بأنه يفهم إن ده مش من صحيح الدين وإن اللي عملوا كده فاهمين الإسلام غلط
طالب رجال الدين بتوعنا اللي فاضيين للفتاوى الجنسية بأنهم يفهموا الناس صحيح دينهم عشان المسلمين مايكونوش دعاية سيئة لنفسهم ولدينهم بره العالم الاسلامي وجواه كمان
وبعدين ممكن تطرح السؤال ده على نفسك واحد غلط فينا بس احنا مش قابلين اننا نقيد حريته نرد عليه إزاي ؟
ونفكر في أي طريقة تانية غير تقييد الحرية طريقة نحترم بها حرية رأي الآخر قدر احترامنا لحرية رأينا الشخصي
ولا إيه ؟؟؟؟؟؟؟؟؟