عاجل من السوبر ماركت

أحب أهني كل مواطن فقير بإن خلاص هو مش هيتوصف بالوصف ده تاني .... ويسعدني إني أزف إليكم نبأ المساواة التي تحققت فعلياً وعلى أرض الواقع ومش أرض الكلام والكدب والضحك ع الدقون .
يا جماعة لقد تحقق المراد لكل العباد كله بقى تمام في الحياة مش بس في المنام .
الخبر لسه عارفاه حالاً ومارضيتش أستنى دقيقة واحدة من غير ما أقول لكم وأعرفكم أو يعني أعرف اللي ماعرفش منكم لان ممكن حد ممكن يكون الخبر اتسرب من بدري وانا اللي مش عارفة .
الخبر الأكيد اللي ماينفعش حد يشكك فيه هو إن كيلو العدس بقى ب 12 جنيه
وتتواتر أنباء عن أن هناك بعض المناطق التي يباع فيها هذا الكنز الاصفر ب 15 جنيه
ألف مبروك يا جماعة الحكومة ساوت بين أكلتنا الشعبية الشهيرة وأكلات الأغنياء لأننا دلوقتي لا هنقدر نشتري ده ولا ده وكتر خيرك يا حكومة وخالص أمنياتي لشعب مصر اللي كسلان ينزل الشارع يطالب بحقه بدوام المساواة بين بضائعه التي يشتريها وبضائع أخوته من الأغنياء والسلام عليكم ورحمة الله وبركاته
بدر العبيدي
من امام سوبر ماركت الشروق
جمهورية مصر العربية